Беларусь павінна выратаваць Нью-Ёрк ад таямнічай секты чараўнікоў
У ЗША выйшаў першы раман у жанры фэнтэзі з серыі пра дзяўчыну па прозвішчы Беларусь.
Цыкл называецца "Хронікі муляра", а твор, які адкрывае яго — "Алхімістык". Аўтарам з'яўляецца амерыканскі пісьменнік Антон Страўт.
"Аляксандра Беларусь — мастачка з Нью-Ёрка, якая прабівае сабе шлях сама, нягледзячы на тое, што яе сям’я валодае буйной нерухомасцю, у тым ліку і хмарачосам ў цэнтры парку Грамерсі, які быў пабудаваны яшчэ яе прапрадзедам, — цытуе анатацыю да 304-старонкавага рамана газета "Рэспубліка".
Але гісторыя сям’і хавае тайну, паведамляецца ў анатацыі далей. Пра яе Аляксандра пазнае пасля раптоўнага нападу на вуліцы, падчас якога яе ратуе нечалавеча моцная крылатая істота, якая ведае прозвішча Беларусь. Аказваецца, пра-прадзед быў масонам-чараўніком. Атакаваны цёмнымі сіламі, ён пакінуў замову для абароны членаў сваёй сям’і. Цяпер, калі Аляксандра ў небяспецы, адно з самых небяспечных і адданых стварэнняў — гаргулля Станіс — зноў вярнулася да жыцця.
Фота — en.wikipedia.org
