Дамініка Строс-Кана выгнала з дому жонка
Экс-кіраўнік Міжнароднага валютнага фонду страціў давер жонкі праз свае сэксуальныя скандалы.
Як паведамляе РБК, жонка палітыка Ан Сінклер каля месяца таму выставіла яго з кватэры ў цэнтры Парыжа. Усе апошнія тыдні яны жывуць паасобку, і справа ідзе да разводу.
Паведамляецца, што Строс-Кан ажаніўся з Ан Сінклер 20 гадоў таму. Журналістка, якая брала інтэрв'ю ў перспектыўнага міністра фінансаў, закахалася ў яго. Прычым яна не асуджала мужа нават тады, як кіраўніка МВФ абвінавачвалі ў згвалтаванні пакаёўкі ў нью-ёркскім гатэлі.
Цяпер жа нядаўні прэтэндэнт на пасаду прэзідэнта Францыі сядзіць дома без працы і вымушаны ўвесь час штосьці даказваць следчым.
Нагадаем, што апроч нью-ёркскай справы, Строс-Кана таксама падазраюць у датычнасці да групы, якая займалася пастаўкай прастытутак у гатэлі французскага горада Ліль.
