Фотакаталогам забаранілі ўезд у Беларусь
Сёння ўначы на беларуска-літоўскай мяжы супрацоўнікі мытні пераходу "Катлоўка" ўзялі на экспертызу 100 экзэмпляраў каталога "Прэс-фота Беларусі 2010".
Рэдактар каталога Юлія Дарашкевіч, якая везла гэтую партыю для перадачы ў беларускія галерэі і бібліятэкі, у жывым эфіры Еўрарадыё паведаміла падрабязнасці інцыдэнту.
Згодна з яе словамі, мытнікі ўважліва праглядзелі ўсе здымкі і, відаць, вырашылі перастрахавацца. Як адзначыла Юлія, яны кудысьці тэлефанавалі па параду, а пасля заявілі: "Фотаздымкі, вядома, добрыя, але там ёсць адна серыя... Вы разумееце, якая".
Верагодна, меліся на ўвазе здымкі, на якіх зафіксаваныя моманты разгону дэманстрацый у Мінску.
"Але ж гэта толькі фотаздымкі, якія толькі адлюстроўваюць нашую рэчаіснасць", — кажа Юлія.
Пасля правядзення экспертызы, якая прадоўжыцца месяц, каталогі абяцалі вярнуць. Праўда, не абяцалі, што іх уезд у Беларусь будзе дазволены.
