Футбалістам "Белшыны" адпомсцілі за выйгрыш у Мінску
Невядомыя напалі на аўтобус з футбалістамі "Белшыны". Здарэнне адбылося ўвечары 25 ліпеня на выездзе з Мінску.
Бабруйскія футбалісты вярталіся з матчу чэмпіянату Беларусі па футболе. На ім "Белшына" выйграла ў футбалістаў "Мінску" з лікам 2:1.
Пры выездзе са сталіцы аўтобус прыпыніўся на стаянцы каля крамы ProStore у Шабанах, паведамляе рэгіянальны партал Бабруйска. Каля 50 агрэсіўна настроеных маладых людзей акружылі аўтобус, дзе знаходзіліся трэнеры, футбалісты і фанаты "Белшына". Нападнікі сталі біць па аўтобусе і спрабавалі прарвацца ў салон.
На гэтым прыгоды бабруйскіх футбалістаў не скончыліся. Ужо на Магілёўскай шашы невядомыя на аўтамабілях і мікрааўтобусах спрабавалі прыціснуць аўтобус да ўзбочыны, а потым перагарадзіць дарогу. На шчасце, ніхто не пацярпеў.
