Google ўводзіць новую палітыку канфідэнцыйнасці
Кампанія ідзе на гэта, нягледзячы на засцярогі, што новаўвядзенне можа супярэчыць законам ЕС аб недатыкальнасці асабістай інфармацыі.
Як паведамляе УНІАН, новая палітыка дазволіць Google збіраць звесткі пра карыстальнікаў са сваіх разнастайных анлайн-сервісаў — YouTube, Gmail и Blogger. У выніку актыўнасць карыстальніка на розных сайтах Google будзе звязана паміж сабой. Кампанія тлумачыць, што гэта дазволіць ёй лепш настроіць вынікі пошуку.
Google аб'яднаў 60 асноўных прынцыпаў, якія раней дзейнічалі для асобных сервісаў, у адзіную палітыку, дзейную для ўсіх прадуктаў кампаніі.
Французскія арганізацыі па абароне персанальнай інфармацыі ўжо заявілі, што такі крок парушае правы канфідэнцыйнасці, якія дзейнічаюць у Еўрасаюзе.
