Мінгарвыканкам скарачае спісы пацярпелых ад выбуху ў метро

Пра гісторыю жанчыны піша "Народная Воля". Мінчанка Алена Лебядзінская падчас выбуху была на эскалатары метро і атрымала лёгкія траўмы рук і галавы. На машыне "хуткай дапамогі" яе даставілі ў 9-ю клініку, дзе апрацавалі раны. Ад шпіталізацыі жанчына адмовілася, бо дома не было з кім пакінуць сабаку. 

На наступны дзень у паліклініцы, кажа Лебядзінская, у яе выявілі павышаны ціск і паставілі дыягназ... "бранхіт". Выпісалі бальнічны. 

Потым жанчына звярнулася ў Мінгарвыканкам па дапамогу як пацярпелая ад выбуху. Праз паўтара месяца, аднак, чыноўнікі заявілі, што Лебядзінская не з'яўляецца пацярпелай ад тэракту ў метро і грашовую кампенсацыю ёй не дадуць. Па іх словах, разлад яе здароўся ніяк не звязаны з выбухам у метро. 

У той жа час у Генпракуратуры Лебядзінскую па-ранейшаму лічаць пацярпелай па крымінальнай справе ў мінскім метро. Пракурорскія работнікі сказалі жанчыне, што яна можа выставіць фінансавыя прэтэнзіі абвінавачваным па справе. За падранае паліто, шалік, пабітыя акуляры ёй налічылі крыху больш за два з паловай мільёны рублёў.