МВФ не прызначыць свайго новага прадстаўніка ў Беларусь

У паведамленні, распаўсюджаным прэс-службай МВФ, гаворыцца, што фонд "імкнецца эфектыўна выкарыстоўваць свае рэсурсы, выдзяляючы іх на тыя праекты і краіны, дзе можна атрымаць максімальную аддачу". Атрымліваецца, што Беларусь у лік гэтых краін не ўваходзіць.

РІА "Новости" адзначаюць, што пастаянны прадстаўнік МВФ можа з'явіцца ў Беларусі толькі ў выпадку, калі будзе вельмі блізкая перспектыва падпісання з нашай краінай новай праграмы, якую падтрымае фонд. Да таго моманту Міжнародны валютны фонд захавае свой офіс у Мінску, але ў ім будуць працаваць мясцовыя супрацоўнікі.

Нагадаем, летась Беларусь звярнулася да МВФ па стабілізацыйны крэдыт у памеры да 7 млрд долараў. Аднак місія фонда ў нашу краіну дагэтуль не прыехала. На сённяшні дзень Беларусь мае запазычанасць перад МВФ у памеры 3,8 млрд долараў.

На здымку Наталля Калядзіна, пастаянная прадстаўніца МВФ у Беларусі. Фота — interfax.by

Адмова Міжнароднага валютнага фонду прызначыць свайго новага пастаяннага прадстаўніка ў Беларусь не нясе ніякай пагрозы эканоміцы нашай краіны і з’яўляецца нармальнай практыкай. Такое меркаванне ў размове з Еўрарадыё выказаў эканміст Леанід Заіка.

МВФ у Беларусі выконваў функцыю куратара, памочніка і назіральніка, але гэты час прайшоў і беларускі ўрад навучыўся самастойна вырашаць шматлікія пытанні як атрымання крэдытаў, так і карэктыроўкі курса нацыянальнай валюты. А ўваходжанне Беларусі ў Мытны саюз, які стварае свае міжнародныя фінансавыя інстытуты і ўвогуле робіць прысутнасць МВФ у нашай краіне немэтазгодным, лічыць Леанід Заіка:

“Гэта нават не Мытны саюз, а новая еўразіская прастора эканамічная. І там ужо створаны міжнародны фінансавы цэнтр. Гэта будуць грошы, якія акамулююцца для агульных эканамічных праграм, для інвестыцыйных праграм, для праграм падтрымкі складаных сітуацый у эканоміцы. І тут Міжнароднаму валютнаму фонду няма чаго рабіць! Калі Расія, Казахстан і Беларусь стварылі свой міжнародны фінансавы цэнтр, якія дзякуючы Расіі дастаткова сур’ёзны па сваіх аб’ёмах, то неабходныя крэдыты могуць быць паспяхова ўзятыя і ў гэтым фінансавым цэнтры”.

На думку эксперта, адмова МВФ прызначаць свайго новага прадстаўніка ў Беларусі не азначае, што нам аўтаматычна адмовяць у 7 мільярдах стабілізацыйнага крэдыту, па які наша краіна звярнулася ў гэтую арганізацыю. Такія пытанні, кажа, усё адно вырашаліся не мінскім прадстаўніком МВФ, а ў штаб-кватэры фонда. А калі Беларусі і адмовяць у гэтым крэдыце, то гэта пойдзе толькі на карысць. 

Заіка нагадвае, што на сённяшні дзень Беларусь і так мае запазычанасць перад МВФ у памеры 3,8 млрд долараў. Да таго ж МВФ — камерцыйная арганізацыя і выдзяляе грошы найперш тым краінам, дзе можна атрымаць максімальную аддачу.