Нацыянальны Алімпійскі камітэт абвяргае дэпутата Гумінскага
Праблем з брытанскімі візамі ў беларускіх алімпійцаў не было. Больш за тое, візы ім не патрэбныя, кажуць у НАК.
"Спартоўцам, якія едуць на Алімпійскія гульні, не патрэбная віза ў пашпарце. Яны маюць спецыяльнае акрэдытацыйнае пасведчанне, якое з'яўляецца дакументам-пропускам на Алімпіяду", — паведаміў Еўрарадыё прэс-сакратар Нацыянальнага Алімпійскага камітэта Алег Грынько.
6 ліпеня на дэбатах па Беларусі ў Парламенцкай асамблеі АБСЕ дэпутат Палаты прадстаўнікоў Віктар Гумінскі папракнуў брытанца Тоні Лойда, аўтара праекта рэзалюцыі па Беларусі: "Я хачу адказаць дарагому спадару Тоні Лойду: тое, што Вялікабрытанія да апошняга моманту не выдавала візы нашым спартоўцам на Алімпійскія гульні — гэта мае месца".
У НАК кажуць, што звесткі пра нявыдачу візаў — неправераная інфармацыя і нейкае непаразуменне.
Фота — era.by
