Пасля дэвальвацыі Турцыя падаражэла на 9 мільёнаў рублёў

Еўрарадыё высвятляла, якія курсы валют зараз у інтэрнэт-крамах, турфірмах і авіякампаніях.

“Алатан-тур” прапанаваў карэспандэнту Еўрарадыё 10-дзённы адпачынак на дваіх у 4-зоркавым гатэлі ў Антал'і за 1600-1700 долараў. Курс такі ж, як і быў два тыдні таму, — 8500 рублёў за долар. У рублях гэта крыху болей за 14 мільёнаў. Месяц таму такая пуцёўка абышлася б амаль у тры разы танней — у 4 мільёны 950 тысяч рублёў. У рублях Турцыя падаражэла больш як на 9 мільёнаў!

Паводле супрацоўніцы турфірмы, курс валют можа вагацца ў залежнасці ад накірунку. Калі ляцець у тую ж Турцыю, але ў Кушадасы, то курс долара будзе 7000 рублёў.

За адпачынак у Балгарыі, Чарнагорыі ці Грэцыі можна разлічыцца еўра ці рублямі па курсе 9835 рублёў за еўра.

11 дзён за дваіх у Грэцыі ў 3-зоркавым гатэлі, з харчаваннем па еўрапейскай сістэме (сняданак-вячэра) абыдуцца ў 1300 еўра. У рублях — меней за 13 мільёнаў: нават танней за адпачынак у Турцыі.

У "Сольвейк-тур" курс на ўсе накірункі фіксаваны: 8500 рублёў за долар і 10500 рублёў — за еўра. Супрацоўніца кажа, што пасля невялікага перапынку людзі зноў пачалі звяртацца. Пакуль набываюць пуцёўкі толькі за валюту.

“Не так шмат, але людзі прыходзяць. Усё адно хочуць адпачываць. У рублях пуцёўкі не набываюць і нават не пытаюцца, таму што нявыгадна. Уявіце, колькі трэба пераплачваць у рублях: гэта можна застацца жабраком. Быў перыяд, калі людзі нечага чакалі, зараз крыху супакоіліся і зразумелі, што трэба ехаць куды-небудзь.”

У інтэрнэт-краме “Мабілайн”, што гандлюе мабільнікамі, 2 тыдні таму долар каштаваў 6000 рублёў. Зараз амерыканская валюта падаражэла, але нязначна — 6200 рублёў.

У інтэрнэт-краме лічбавай тэхнікі gigant.by курс долара трымаецца на ўзроўні 6200 рублёў ужо цягам двух тыдняў.

Супрацоўнік кажа, што асноўная частка пакупак робіцца ў рублях — курс задавальняе ўсіх.

“Быў невялікі заняпад, а цяпер людзі пачынаюць набываць тавары болей. Прыкладна тыдзень ужо. Людзі пазбаўляюцца ад рублёў ці ўсё становіцца на свае месцы. Будзем працаваць, пакуль штосьці прадаецца. Нешта загадваць зараз цяжка.”

У “Турэцкіх авіялініях” еўра патаннеў на 1700 рублёў. Калі 2 тыдні таму курс тут быў 12500 рублёў за еўра, то цяпер — 10800 рублёў. У той жа час у нацыянальнай кампаніі “Белавія” наадварот — валюта аб'яднанай Еўропы падаражэла: 2 тыдні таму еўра каштаваў 6960 рублёў, а цяпер — 7300 рублёў. 

А вось на сайце aw.by, што спецыялізуецца гандлем аўтазапчастак, еўра патаннеў амаль на 5 тысяч рублёў. Узмацняльнік тормазу для Audi A4, што каштуе 25,3 еўра, два тыдні таму абыйшоўся б у 310 000 тысяч рублёў (курс еўра — 12280 рублёў). Зараз прыйдзецца заплаціць на 30 працэнтаў меней — 220 000 рублёў паводле курсу 8700 рублёў за еўра.

Фота: hotelaqua.com