Расійскай дэлегацыі ў ААН забароняць піць
Пастаянны прадстаўнік Расіі пры ААН Віталь Чуркін паабяцаў, што забароніць ужываць алкаголь падчас дзелавых сустрэчаў.
Такім чынам дыпламат адрэагаваў на закіды свайго амерыканскага калегі Джозэфа Тарсэлы, якога абурыла празмерная цяга да спіртнога ў штаб-кватэры ААН.
Тарсэла, які курыруе ў амерыканскай дэлегацыі пытанні, звязаныя з арганізацыяй працы і рэфармаваннем ААН, 4 сакавіка абвінаваціў сваіх калегаў па бюджэтным камітэце Генеральнай Асамблеі ў залішняй сімпатыі да алкаголю, асабліва ў зімовыя святы. Акурат у гэты перыяд зацвярджаецца рэгулярны бюджэт арганізацыі.
У мінулым снежні карэктаванне бюджэту ААН на 2012-2013 гады заняла нязвыкла доўгі час і завяршылася толькі напярэдадні каталіцкіх Калядаў, адзначае Радыё "Свабода". На думку Тарсэлы, прычынай стала тое, што шэраг сябраў камітэту залішне захапляліся наведваннем шматлікіх святочных прыёмаў і з'яўляліся на нарады ў мала прыдатным для працы стане.
Таму амерыканскі дыпламат прапанаваў абвясціць штаб-кватэру ААН "зонай, вольнай ад п’янства".
