Размоўнік Беларусь—ЕС

ЕСаўска-Беларускі размоўнік

Дзеянне ЕС

Інтэрпрэтацыя Мінска

Каментарый

Рэзалюцыя Еўрапарламента: заклікаем вызваліць палітвязняў і распачаць рэформы!

Мінск: нас хочуць "нахіліць" і прымусіць падпарадкоўвацца.

Мінск успрымае заклікі як ціск і ўмяшанне ва ўнутраныя справы. Пайсці на саступку — значыць праявіць слабасць, "пасля штораз нахіляць будуць".

Савет ЕС: уладам Беларусі трэба пачаць дыялог з апазіцыяй і грамадзянскай супольнасцю.

Мінск: нас хочуць пазбавіць улады і аддаць яе "пятай калоне".

Апазіцыя ўспрымаецца як надзвычай слабы гулец, з якім нельга гаварыць на роўных без таго, каб страціць аблічча. Апазіцыя патрэбная ўладзе толькі для імітацыі дэмакратычных працэдур.

Сікорскі-Туск-Вестэрвеле: Беларусь атрымае 3-9 і г.д. млрд, калі распачне рэформы.

Мінск: нас намагаюцца жорстка ашукаць, грошай-то такіх у іх няма.

Улады ўспрымаюць такія не канкрэтызаваныя публічныя прапановы як пустыя абяцанкі і спробу падманам прымусіць беларускае кіраўніцтва адмовіцца ад часткі ўладных паўнамоцтваў. Зранку грошы — увечары крэслы!

Фюле: мы ўзмоцнім падтрымку грамадзянскай супольнасці Беларусі.

Мінск: яны будуць плаціць апазіцыі, каб яна арганізавала рэвалюцыю.

Любое ўмацаванне партнёрства ЕС з няўрадавым сектарам у Беларусі без удзелу ў гэтым працэсе ўрада разглядаецца як варожае дзеянне і падкоп пад уладу прэзідэнта.

Эштан: у нас ёсць сумневы ў вінаватасці Канавалава і Кавалёва, заклікаем увесці мараторый на смяротнае пакаранне.

Мінск: Еўропа падтрымлівае тэрарызм у Беларусі, абы скінуць Лукашэнку.

Такія заявы з боку еўраструктур  разглядаюцца як блюзнерства і ўмяшанне ва ўнутраныя справы.

Савет ЕС уводзіць візавыя абмежаванні.

Мінск: яны прынізілі прэзідэнта і яго людзей; трэба прынізіць іх галоўнага (як яго там?) і яго людзей.

Візавыя абмежаванні супраць Лукашэнкі і вышэйшых чыноўнікаў азначаюць аўтаматычнае перарыванне кантактаў на высокім і сярэднім узроўнях. Дыялог з Беларуссю без дыялогу з Лукашэнкам маларэальны.

ЕС уводзіць кропкавыя эканамічныя санкцыі.

Мінск: гэта абвяшчэнне вайны! Але гандаль перарываць нельга, таму будзем адыгрывацца на "пятай калоне" і іх дыпламатах.

У Мінска няшмат рычагоў уздзеяння на Брусэль і шмат эканамічных інтарэсаў у ЕС. Таму ў якасці аб'ектаў для рэакцыі ў адказ выбіраюцца "агенты ЕС" у Беларусі — апазіцыя і НДА.

Беларуска-ЕСаўскі размоўнік

Дзеянне Мінска

Інтэрпрэтацыя Брусэля

Каментарый

У Мінску чарговы раз разагналі дэманстрацыю і зняволілі палітычных апанентаў.

Адбыўся сур'ёзны адкат дэмакратыі; кроў льецца ракой, апазіцыянераў катуюць і спальваюць кнігі Някляева.

Еўрапейскія палітыкі больш схільныя прыслухоўвацца да меркавання беларускай апазіцыі, а еўрапейскія СМІ — канцэнтравацца на негатыве. Пры абмежаваных афіцыйных кантактах гэта часта параджае неразуменне рэальнай сітуацыі.

Беларускія ўлады праводзяць больш-менш ліберальную выбарчую кампанію, а пасля раптам разганяюць Плошчу.

Сікорскі-Вестэрвеле-Більд: нас "кінулі" і выставілі клоўнамі — трэба ўзмацніць ціск на рэжым.

Шмат у чым паглыбленне канфлікту выклікана персанальнай фрустрацыяй цэлага шэрагу еўрапейскіх палітыкаў, якія ўклалі сваю рэпутацыю ў вырашэнне "беларускага пытання".

Мінск у адказ на візавыя санкцыі выганяе амбасадараў ЕС і не выпускае апазіцыянераў з краіны.

Ага! Санкцыі дзейнічаюць! Паднаціснем яшчэ трошку — і рэжым пахіснецца!

Контрмеры Мінска ўспрымаюцца Еўрасаюзам як паказчык дзейнасці санкцый для беларускіх уладаў.

Лукашэнка: Барозу  — казёл, а Вестэрвеле наогул блакітны.

Лукашэнка нас не паважае, ён не ўмее паводзіць сябе, дзікун і калгаснік, што з яго возьмеш?

Абразлівая рыторыка, закліканая прадэманстраваць "геапалітычнаму монстру" сваю непакорнасць і адвагу ўспрымаецца ім як абуральнае дзікунства і пацверджанне правільнасці курсу на ізаляцыю.

МЗС: Беларусь гатовая да дыялогу на раўнапраўных умовах і не пацерпіць ціску.

Беларусь гатовая выконваць нашы патрабаванні. Дык чаго ж яна, &%^8#, марудзіць?

Беларусь пад дыялогам разумее двухбаковыя кантакты на вышэйшым узроўні на роўных без аніякіх папярэдніх умоваў, а Брусэль — трохбаковыя (з улікам апазіцыі) кансультацыі па паступовай дэмакратызацыі Беларусі.

Лукашэнка: калі вы на нас ціснеце, то мы будзем інтэгравацца з Расіяй.

Інтэгруйцеся хоць з Берагам Слановай Косткі. Але калі Расія ўзмацняе свой уплыў на рэжым, то трэба дамаўляцца з Пуціным, каб ён дамовіўся з Лукашэнкам, каб той сябе добра паводзіў.

З узмацненнем рэпрэсій у Беларусі аргумент аб пагрозе паглынання Беларусі Расіяй працуе ўсё менш. Брусэль разумее, што дужацца з Расіяй у беларускім пытанні ён не здолее, і таму будзе аддаваць перавагу кааперацыі з Расіяй, у тым ліку і адносна Беларусі.

Лукашэнка: Захад не супакоіцца, пакуль не зваліць Лукашэнку.

Нам да лямпачкі, хто будзе кіраваць у гэтай усходняй краіне, галоўнае — каб ён сябе добра паводзіў і не саджаў апазіцыянераў.

Дэмакратыя і прадказальнасць сапраўды вельмі важныя для ЕС. Праблема не ў Лукашэнку, а ў стылі яго паводзінаў. Тэма дэмакратыі яшчэ больш узмацнілася пасля арабскіх рэвалюцый.

Лукашэнка: Беларусь — суверэнная дзяржава, яна не дасць сябе "нахіліць" і будзе рабіць захады ў адказ.

Лукашэнка ізноў будзе катаваць апазіцыянераў. У Еўропе нельга сябе паводзіць, як у Азіі!

ЕС усё яшчэ лічыць беларусаў еўрапейцамі, якія мусяць імкнуцца ўвайсці ў ЕС, а значыць мусяць праводзіць у сябе дэмакратычныя рэформы і набліжаць заканадаўства да еўрапейскага.

Дыялектызмы

Беларуская апазіцыя: патрэбна больш санкцый супраць рэжыму і больш грошай для апазіцыі!

Брусэль: трэба больш санкцый супраць рэжыму!

Мінск: "пятая калона" хоча разбурыць дзяржаву, а ЕС ёй у гэтым дапамагае. Хаця грошы можна і засвоіць...

No comments