Шушкевіч: Лёс СССР быў наканаваны (відэа)
Былы беларускі кіраўнік расказаў у Таліне пра сітуацыю ў Беларусі і пра развал савецкай імперыі.
У талінскім інфармацыйным цэнтры Еўрапейскага саюза прайшла дыскусія, прысвечаная Беларусі. Зладзіла мерапрыемства моладзевая арганізацыя "Адкрытая рэспубліка".
“Развал СССР — гэта заканамерны гістарычны працэс, — распачаў свой выступ на мерапрыемстве тагачасны кіраўнік Беларусі Станіслаў Шушкевіч. — Асоба яго можа толькі паскорыць ці замарудзіць. Лёс СССР быў наканаваны. Усе вялікія імперыі завяршаюць сваё існаванне.”
Станіслаў Шушкевіч ганарыцца, што спрычыніўся да распаду Савецкага Саюза і дамогся прызнання Расіяй незалежнасці Беларусі.
Палітык даў шчырую ацэнку і некаторым установам, і канкрэтным апазіцыйным палітыкам.
"Зручна выдаваць сябе за апазіцыянераў, а б'юць іншых на плошчы. І прытым Еўропа іх слухае... Я да нядаўняга часу не крытыкаваў такіх людзей, але надакучыла. Зараз кажу ўсю праўду-матку”.
Мясцовая журналістка Хале Цюкмаа кажа, што для эстонцаў існуе як бы дзве Беларусі.
Хале Цюкмаа: “Ёсць як бы дзве Беларусі. Адна — недзе там, далёка. Гэта — былая савецкая рэспубліка, шмат рускамоўных, прэзідэнт — Лукашэнка, ён —дыктатар. Гэтая Беларусь нас мала хвалюе. Іншая ж Беларусь — гэта беларусы, якія сюды прыязджаюць, якія тут жывуць”.
Адзін з іх — Дзяніс Прыстромскі, этнічны беларус і ў той самы час карэнны жыхар Таліна.
Дзяніс Прыстромскі: “Я ўпэўнены, што кожнаму, хто хоць трохі адчувае сябе беларусам, вельмі важна дзейнічаць у падобных дыскусіях, займацца самаразвіццём, больш даведвацца пра сваю культуру, сваіх продкаў”.
Пасля развалу СССР Беларусь і Эстонія пайшлі рознымі гістарычнымі дарогамі. Праз 20 гадоў Эстонію ведаюць як адну з самых перадавых краін ў сферы інтэрнэт-тэхналогій, а Беларусь — як апошнюю дыктатуру Еўропы.
