У Чашніцкага раёна могуць памяняць сталіцу
Замест цяперашняга раённага цэнтра Чашнікі на гэты статус прэтэндуе горад Новалукомль.
Магчымасць надання гораду энергетыкаў статусу раённага цэнтра была агучана старшынёй Віцебскага аблвыканкама Аляксандрам Косінцам.
"Будзем гэтае пытанне абмяркоўваць, паглядзім, як яго можна вырашыць. Аднак і Чашнікі неабходна развіваць", — сказаў ён падчас сумеснага пасяджэння Віцебскага аблвыканкама і прэзідыума абласнога Савета дэпутатаў.
БЕЛТА нагадвае, што ў 2013 годзе Новалукомль адзначыць 50-годдзе з часу заснавання. Там размешчаны буйныя прамысловыя прадпрыемствы, працуе Лукомльская ГРЭС. Насельніцтва горада складае каля 16 тысяч чалавек. А вось у Чашніках жыве прыкладна 9 тысяч чалавек, там адсутнічаюць буйныя прадпрыемствы.
