У каталікоў і пратэстантаў — Вербная нядзеля
Вернікі, падрыхтаваныя велікапосным пакаяннем, у гэты дзень пачынаюць перажываць пасхальную таямніцу смерці і ўваскрэсення Езуса Хрыста.
Свята, якое адзначаюць за тыдзень да Вялікадня, называюць яшчэ Пальмовай нядзеляй. У гэты дзень на ўспамін уваходу Хрыста ў Ерузалем для здзяйснення пасхальнай таямніцы адбываецца працэсія або ўрачысты ўваход перад святой Імшою, а таксама асвячаюцца галінкі пальмаў і іншых дрэваў. Гэта могуць быць таксама галінкі аліўкавых дрэваў або, як здаўна прынята ў нас, вярбы.
Гэтая традыцыя грунтуецца на евангельскім апісанні месіянскага ўваходу Хрыста: “У той час мноства людзей, якія прыйшлі на свята, калі пачулі, што Езус ідзе ў Ерузалем, узялі пальмовая галінкі і выйшлі Яму насустрач, усклікаючы: Гасанна! Благаслаўлёны той, хто прыходзіць у імя Пана, Валадар Ізраэля!”
Пальмовая нядзеля прысвечана асабліваму разважанню пра муку Пана і непасрэдна рыхтуе вернікаў да перажывання яе ў літургічных абрадах Вялікага тыдня. Евангельскае апісанне мукі Езуса Хрыста і Яго смерці на крыжы чытаецца ў гэты дзень на кожнай святой Імшы.
Фота: svaboda.org
