Уга Чавес зноў паляціць на Кубу лекавацца
Прэзідэнт Венесуэлы збіраецца ехаць туды ўжо сёння, 16 ліпеня. На выспе свабоды яму, сярод іншага, трэба прайсці курс хіміятэрапіі.
Зусім нядаўна Чавес вярнуўся на радзіму. На Кубе ён прабыў месяц. Там лідэру Баліварскай рэспублікі выдалілі ракавую пухліну. У адпаведнасці з патрабаваннямі канстытуцыі ён звярнуўся да парламенту з просьбай дазволіць яму зноў з’ехаць, каб працягнуць лекаванне, паведамляе ВВС.
Уга Чавес прыехаў дадому напярэдадні нацыянальнага свята Венесуэлы — 200-годдзя незалежнасці ад Іспаніі. Па рэкамендацыях лекараў ён рэзка скараціў аб’ём сваёй працы. Дагэтуль прэзідэнт не прызнаваўся, дзе менавіта ў яго знайшлі ракавую пухліну. Ён абмежаваўся толькі паведамленнем, што аперацыю зрабілі ў брушной поласці.
