Улады Літвы абвяргаюць Мінэнерга Беларусі
Міністэрства абароны навакольнага асяроддзя Літвы сёння выступіла з абвяржэннем паведамленняў з Мінска, што Літва больш не мае прэтэнзій па беларускай АЭС.
Гаворка ідзе пра распаўсюджаную БЕЛТА інфармацыю пра тое, што Літва, нібыта, не мае прэтэнзій да Ацэнкі ўздзеяння на навакольнае асяроддзе (АУНА) будучай АЭС у Беларусі, паведамляе ІА REGNUM.
Літоўскае міністэрства сцвярджае, што заявы намесніка энергетыкі Беларусі Міхаіла Міхадзюка, якія цытуе агенцтва БЕЛТА, "не адпавядаюць рэчаіснасці". "Літва дагэтуль не ўхваліла справаздачу АУНА. Літва так і не атрымала адказаў на пытанні наконт крытэраў выбару пляцоўкі ў Астраўцы, які знаходзіцца ўсяго ў 50 км ад Вільні, а таксама праўдзівасці высноваў, прадстаўленых у АУНА", — адзначаецца ў абвяржэнні.
Нагадаем, Міхадзюк, распавядаючы сёння пра планы будаўніцтва АЭС у Гродзенскай вобласці, адзначыў, што афіцыйны Мінск выконвае патрабаванні МАГАТЭ, "завяршыў абмеркаванне справаздачы аб АУНА з Літвой і мае цвёрды намер рэалізоўваць праект будаўніцтва АЭС, нягледзячы на пратэсты эколагаў".
