За Кубак Беларусі "Металург" паспрачаецца з "Гомелем"
Чэмпіёны краіны хакеісты жлобінскага "Металурга" згуляюць з бронзавым медалістам нацыянальнага першынства "Гомелем" у фінале Кубка Беларусі.
Вырашальны паядынак адбудзецца 1 верасня на "Мінск-Арэне".
Жлобінскі "Металург" датэрмінова забяспечыў сабе першае месца ў групе I і атрымаў пуцёўку ў фінал яшчэ пасля перадапошняга тура папярэдняй стадыі. Лёс другога фіналіста вырашаўся ў сераду ў Гродне, дзе сышліся мясцовы "Нёман" і "Гомель", перадае БЕЛТА.
"Нёман" выйграваў, і пад канец сустрэчы гамельчукі памянялі брамніка на палявога гульца, каб выратаваць сітуацыю. І за 42 секунды да заканчэння гульні форвард "Гомеля" Аляксей Дзмітрыеў зраўняў лік — 2:2.
Пасля гэтага "Нёман" таксама зняў брамніка, аднак гэта не дапамагло гродзенцам. Авертайм не прынёс поспеху нікому з супернікаў, а ў серыі пасляматчавых булітаў удача пасміхнулася "Гомелю". Гульня скончылася з лікам 2:3 на карысць гамельчукоў.
Фота — ilook.by
