Міністэрствы і мясцовыя ўлады не зацікаўленыя ў прыватызацыі
Пра такі "фактар", які стрымлівае прыток інвестыцый, паведаміў сёння ў Палаце прадстаўнікоў віцэ-прэм'ер Сяргей Румас.
На яго думку, шмат якія чыноўнікі не зацікаўленыя ў прыходзе замежнага інвестара ці эфектыўнага прыватнага ўласніка, бо "ў гэтым выпадку будзе бачная нежыццяздольнасць чыноўнікаў як бізнесмэнаў".
Тым не менш, як заявіў віцэ-прэм'ер, сёлета ўрад плануе шырокую прыватызацыю, "значна большую за ўсе мінулыя гады". Прычына відавочная: дзяржава ўкладае ў прадпрыемствы каласальныя сродкі, а належнай аддачы не атрымлівае, адзначыў Румас.
