Слонімскія індывідуальныя прадпрымальнікі працягваюць страйк

Больш за 300 індывідуальных прадпрымальнікаў працягваюць страйкаваць у горадзе Слонім Гродзенскай вобласці. Яны пратэстуюць супраць штрафаў і канфіскацый тавару, якія праводзіць мясцовая падаткавая інспекцыя. Працу працягваюць толькі тыя прадпрымальнікі, якія прадаюць прадукты, што могуць хутка сапсавацца.

Вось як пракаментаваў “Еўрарадыё” пазіцыю ўдзельнікаў страйку адзін з слонімскіх прадпрымальнікаў:

“Мы заўсёды гатовыя на кампраміс, на рашэнне праблем. Толькі чакаем узаемных дзеянняў ад чыноўнікаў. Але яны пакуль насустрач нам не ідуць”.

Учора адбылася сустрэча прадстаўнікоў слонімскіх прадпрымальнікаў з мясцовымі чыноўнікамі, але пакуль станоўчага рашэння не было дасягнута.

“Людзі настроеныя стаяць да канца”, кажа адзін з удзельнікаў страйку. Паводле яго словаў, прадпрымальнікі настроеныя не выходзіць на працу нават на працягу некалькіх месяцаў, калі іх патрабаванні не будуць выкананыя.