Талачынцы абараняюць стары парк ад камунальнікаў

“Рукі прэч ад парка Юзэфполле!”- пад такім дэвізам у горадзе Талачыне (Віцебская вобласць) стартавала кампанія па выратаванні старадаўняга парка. Юзэфполле — гэта помнік прыроды сядзібнага тыпу, які ахоўваецца дзяржавай. Штуршком да акцыі стаў выпадак, калі мясцовыя камунальнікі высеклі некалькі дзясяткаў дрэваў рэдкіх парод. У адказ актывісты экалагічнага руху, школьнікі і педагогі пачалі збор подпісаў, патрабуючы прыцягнуць да адказнасці вінаватых. Пагатоў, што ссячы запланавана ажно 180 дрэваў.

Як паведамляе сайт "Народныя навіны Віцебска", юрыдычную дапамогу кампаніі паабяцалі праваабаронцы Беларускага Хельсінскага камітэта.