У Баранавіцкім раёне дзейнічаюць нахабныя махляры

Дзве крымінальных справы па фактах махлярства распачатыя ў Баранавічах.  У адным выпадку да 88-гадовай бабулі з вёскі Сталавічы прыйшла дзяўчына і сказала, што яна яе сваячка, прыехала з Польшчы. Але зламалася машына, на рамонт якой патрэбна 400 тысяч рублёў. Аддаўшы грошы, гасцей бабуля так і не дачакалася ды звярнулася ў міліцыю.

А ў Баранавічах 85-гадоваму дзядулю малады чалавек прадставіўся сябрам сына. І паведаміў, што, нібыта, той даў яму 200 тысяч рублёў на набыццё колаў для машыны. Але грошай не хапае, патрэбныя яшчэ 250 тысяч рублёў. Дзядуля неабходную суму махляру аддаў.

Сёлета ў Баранавічах зафіксаваныя 29 такіх злачынстваў, 22 з іх былі раскрытыя.

Іван Юрашчык, Еўрарадыё, Баранавічы