У Беларусі ўпершыню аштрафавалі карыстальнікаў "пірацкай" Windows

Суд Мінскага раёна аштрафаваў групу кампаній "Родная сторона" за выкарыстанне неліцэнзійных версій Windows. Гэта першы выпадак такога штрафу ў Беларусі, перадае tut.by са спасылкай на прадстаўніцтва Microsoft у нашай краіне.

Інспекцыя праваахоўных органаў выявіла, што на камп'ютарах кампаніі стаялі пірацкія копіі аперацыйнай сістэмы Microsoft Windows і Microsoft Office. Суд Мінскага раёна аштрафаваў кампанію на 40 базавых велічыняў. Яшчэ на 22 базавыя велічыні аштрафавалі супрацоўніка, адказнага за IT-інфраструктуру кампаніі.

Палкоўнік Аляксандр Еўсюкоў, намеснік начальніка галоўнага ўпраўлення па барацьбе з эканамічнымі злачынствамі крымінальнай міліцыі, адзначыў, што для іміджу дзяржавы і эканомікі краіны вельмі важна выкарыстоўваць легальнае праграмнае забеспячэнне.

Фота — migom.by