У Беларусі знізяць дапушчальную дозу алкаголю ў крыві кіроўцаў

У суседніх з намі краінах пачалі зніжаць максімальна дапушчальныя праміле алкаголю. У Расіі і Ўкраіне іх увогуле знізілі да нулю. Цяпер такая ініцыятыва з'явілася і ў Беларусі.

"Гэта ініцыятыва Міністэрства аховы здароўя, і ДАІ яе цалкам падтрымлівае. Яны прапануюць 0,3 праміле. Зараз у нас 0,5 — гэта стан алкагольнага ап'янення і складаецца пратакол", — распавялі Еўрарадыё ў ДАІ.

Зараз дакументы з новымі нормамі праходзяць юрыдычную экспертызу, кажа галоўны нарколаг Міністэрства аховы здароўя Аляксей Аляксандраў:

"Зараз вядзецца распрацоўка дакументаў, але яны не выйдуць з сценаў міністэрства, пакуль не пройдуць юрыдычную ацэнку".

Беларусь з'яўляецца ўдзельнікам Міжнароднай канвенцыі аб правілах дарожнага руху, якая прынятая ў Вене ў 1968 годзе. Канвенцыя патрабуе, каб у законе кожнай краіны-ўдзельніцы была прапісана дапушчальная норма алкаголю ад 0 да 0,8 праміле.

Звязана гэта з тым, што паказанні часта можа даць не толькі выпіты алкаголь, кажа Аляксандр Алішэвіч, намеснік галоўнага нарколага Мінскага дыспансера:

"Могуць пытанні ўзнікаць з лекавымі настойкамі. Нават ад іх гэта можа ўзнікнуць пры ўмове, што іх вып'юць болей, чым прызначыў лекар. Таксама кіроўцы часта памыляюцца, калі думаюць, што ўчора выпіў, а раніцай нічога не засталося. Пасля ночы, калі чалавек паспаў, застаецца шмат астаткаў".

Паказаць 0,3 праміле можа нават кефір. Але толькі у тым выпадку, калі быў выпіты перад экспертызай.

Аляксандр Алішэвіч: "Калі кефір быў нясвежы і там пачаліся працэсы спіртавага закісання, то адразу пакажа — але толькі адразу. У крыві алкаголю не будзе ў гэтым выпадку. Проста ён праз паветра трапляе не з лёгкіх, а з малекул, якія засталіся".

Таму калі вы сапраўды не ўжывалі алкаголь, а прыбор паказаў нейкае перавышэнне, трэба ехаць на экспертызу ў наркалогію: там памылкі ўжо не будзе.

Аляксандр Алішэвіч: "На няякасных прыборах можа паказаць. У нашым наркадыспансеры на ўзбраенні аналізатары канцэнтрацыі пароў этанола. Яны рэагуюць менавіта на этанол. Яны не пакажуць на ацэтон ці на язву, калі з'яўляецца кіслата. А старыя прыборчыкі партатыўныя рэагуюць на тытунёвы дым. Але мы такімі не карыстаемся".

Многія кіроўцы памыляюцца, калі лічаць, што выпіты вечарам алкаголь зранку ўжо знікае. У мужчыны, які важыць 80 кілаграмаў, за гадзіну перапрацоўваецца 5-10 грамаў чыстага этанолу. Так, спажытыя 0,5 гарэлкі знікнуць мінімум праз 20 гадзінаў. А бутэлька піва выветрыцца цалкам праз 3-4 гадзіны. Але калі выпіць 0,5 піва, прыбор не пакажа 0,3 праміле ўжо праз гадзіну. Але, згодна са словамі нарколагаў, нават такая нізкая канцэнтрацыя ўплывае на стан чалавека.

Аляксандр Алішэвіч: "Я ўвогуле прыхільнік таго, каб былі абсалютныя нулі. Пасля глытка любога спіртавага напоя ўжо праз 3-4 хвіліны ён — у мазгах. Ён адназначна расстройвае канцэнтрацыю ўвагі. А рассеяны кіроўца за рулём — гэта патэнцыйны забойца. Вядома, калі праміле зашкальвае, то гэта ўжо яўны забойца. Але нават пры 0,2 аказвае ўплыў. Таму ў гэтым выпадку я быў бы больш жорсткі і непахісны".

Дарэчы, 0,5 праміле пакажа выпітыя 50 грам гарэлкі, бутэлька піва ці 200 грам віна.

"За студзень-ліпень 2010 года ў нас па віне кіроўцаў у нецвярозым стане адбылося 295 здарэнняў, у якіх загінулі ці пацярпелі людзі. Усяго за паўгода было 2380 здарэнняў, у якіх пацярпелі людзі".

А вось што лічаць мінскія кіроўцы на гэты конт.

Дарэчы, па нулях алкаголь не толькі ў Расіі і Ўкраіне, а таксама ў Албаніі, Босніі і Герцагавіне, Венгрыі, Грузіі, Ліхтэнштэйне, Азербайджане, Македоніі, Малдове, Румыніі, Славакіі, Славеніі, Швейцарыі, Харватыі і Чэхіі.

Максімальныя 0,8 праміле — у Люксембургу, Ірландыі, Брытаніі і Мальце. У суседніх з намі Латвіі — 0,5 праміле, Літве — 0,4 праміле, у Польшчы — 0,2.

А ў Нямеччыне дапушчальны ўзровень — 0,5 праміле, але калі кіроўца патрапіў у здарэнне, то яго пакараюць ужо за любое ўтрыманне алкаголю ў крыві.