У Брэсце міліцэйскі УАЗ стукнуўся ў дрэва (фота)
Удар быў такой моцы, што непрышпілены пасажыр разбіў галавой шыбу.
Аварыя адбылася паабедзе 25 студзеня. Сайт real.brest спасылаецца на словы начальніка аддзела агітацыі і прапаганды Брэсцкай абласной дзяржаўтаінспекцыі Наталлі Сахарчук, што за стырном быў малады кіроўца без досведу, які не справіўся з кіраваннем.
На фота бачна, што ў аўтамабіля ад удару цалкам адкрыўся капот. На пярэдняй ветравой шыбе справа насупраць месца пасажыра бачная характэрная круглая пляма з сеткай расколін ад удару знутры.
У брэсцкай блогасферы з’явіліся каментары меркаваных сведкаў. Яны пішуць, што нібыта спачатку з пабітага аўтамабіля выскачылі два міліцыянты ў шокавым стане. Яны пацерлі твары снегам, потым вывелі з задняй часткі салона дзвюх дзяўчын. Найхутчэй, іх некуды ў спешным парадку падвозілі.
Заўважым, што акурат перад месцам дарожна-транспартнага здарэння знаходзіцца пешаходны пераход.
Вядзецца расследаванне.
