У новым альбоме J:морс будзе "пазітыўнае музло"

На канцэрце ў к/з "Мінск", якім гурт J:морс распачаў гастрольны тур па абласных цэнтрах Беларусі, музыканты прэзентавалі 2 новыя песні — "VJ солнце" і "Весна-красна". Нягледзячы на песімістычныя прагнозы, "Морсы" зноў сабралі паўнюткую залу, адыгралі 2,5 гадзінную "хітовую" праграму і дадалі "перцу" новымі інструментамі Як распавёў Еўрарадыё Уладзімір Пугач, праца над кампазіцыяй "Весна-красна" ужо цалкам скончана, і ў завершаным выглядзе песня з'явілася ў плэй-лістах радыёстанцый.

"А песня "VJ солнце" пакуль знаходзіцца ў стадыі аранжыроўкі", — працягвае Уладзімір. — "Мы над ёй працуем і, верагодна, яна з'явіцца на нашым новым альбоме, які мы плануем выпусціць восенню. Пакуль мы абкатваем "VJ солнце" на канцэртах".

Што тычыцца новага альбома, у адрозненні ад крыху хмурнаватага "Аквамарына", плыта будзе значна больш пазітыўнай, больш рамантычнай і менш жорсткай, дзеліцца адчуваннямі Уладзімір Пугач.

Уладзімір Пугач: "Наступны дыск абяцае быць іншым, адрознівацца ад таго, што мы рабілі раней. Таму што ён ўжо зараз іншым вымалёўваецца, нават па ацэнках назіраючых з боку. Я лічу, што гэта будзе пазітыўнае музло — такая зараз хваля ў нашай творчасці".

Неўзабаве на нашым сайце вялікі фотарэпартаж з канцэрта J:морс  ў к/з "Мінск"