У Рэчыцы штраф за «культ асобы Лукашэнкі» спаганяюць нават з дзяцей

У Рэчыцы штраф, накладзены на актывіста дэмакратычнага руху, спаганяюць з ягонай дачкі.  Старшыня абласной арганізацыі Беларускай сацыял-дэмакратычнай партыі (Грамада) Алег Шабетнік быў аштрафаваны на паўтара мільёна рублёў за канфіскаваныя ў яго на беларуска-украінскай мяжы матэрыялы ўстаноўчай канферэнцыі Саюзу левых партый і брашуры «Аб кульце асобы Лукашэнкі». Штраф ён выплачваў часткамі. Аднак нечакана даведаўся, што з рахунка яго 11-гадовай дачкі Ліды знікла больш за паўмільёна рублёў. Гэта былі грошы, якія дзяўчынка атрымлівала як дапамогу ад дзяржавы з прычыны страты маці.

Распавядае Алег Шабетнік:

«Я прыйшоў у банк, каб даведацца, колькі на рахунку грошай. Я гляджу: там спісана 539 тысяч. Запытаўся: Што такое? Сказалі, што «спісалі на нейкі штраф». На які, ніхто нічога не ведаў».

Паводле словаў Шабетніка, зараз судовыя выканаўцы зацікавіліся яго аўтамабілем.