З магілёўскай спецвучэльні збеглі два падлеткі
Жлобінская міліцыя шукае двух 17-гадовых ураджэнцаў горада, якія 27 жніўня збеглі з закрытай магілёўскай спецПТВ №2.
Як інфармуе сайт odsgomel.org, падлеткаў Івана Кірыенку і Вадзіма Свянцецкага не могуць знайсці ўжо два месяцы. Акрамя міліцыі, у пошуках задзейнічаны валанцёры пошукава-выратавальнага атрада "Сімуран".
Нагадаем, што раней паведамлялася пра масавыя ўцёкі падлеткаў з гэтай спецвучэльні 26 верасня. Тады са спецПТВ самавольна сышлі 32 навучэнцы. Па звестках міліцыі, на працягу сутак усіх іх знайшлі, акрамя трох.
Самавольны сыход Кірыенкі і Свянцецкага, верагодна, быў нечым накшталт "другой хвалі" ўцёкаў.
Фота з сацыяльных сетак
