“Жыццё, каханне і перамены” ад Лені Кравіца

Восьмая ў дыскаграфіі артыста плытка завецца вельмі прэтэнцыёзна — «It Is Time for a Love Revolution» (Гэта час для рэвалюцыі кахання). У інтэрв'ю рэсурсу Popmatters музыка сказаў, што альбом прысвечаны «жыццю, каханню і пераменам. Гэта вельмі пазітыўная плытка, і яна тычыцца таго, што зараз адбываецца ў свеце. Мы ніколі не зможам змяніць і палепшыць становішча рэчаў датуль, пакуль мы не будзем думаць усе разам, глабальнай супольнасцю. Гэтаму і прысвечаны мой альбом — каханню, разуменню, зносінам. Ён прысвечаны нам, усім людзям Землі!».

На пытанне пра музычны бок альбома Лені Кравіц адказаў, што гэта будзе «сапраўдны рок-н-рол з элементамі фанка і блюзу. Я асабліва не мудрагеліў з аранжыроўкамі — усё зроблена і адыграна вельмі проста. Я зазначу, што гэта працуе мацней, б'е проста ў твар — не як перапрадзюсіраваны поп-запіс».

Некаторыя новыя песні, як прызнаўся Лені, носяць ярка выяўлены палітычны характар. Так, кампазіцыя «Back in Vietnam» намякае, па словах музыкі, на тое, што адбываецца зараз у Іраку. «Гісторыя паўтараецца. Навошта некалькі разоў наступаць на адны і тыя жа граблі?» - па-філасофску зазначае Кравіц.