Адвентыстам сёмага дня не дазволілі пераздаць суботняе ЦТ
Адвентысты сёмага дня, якія не здавалі цэнтралізаванае тэставанне ў суботу, не змогуць скарыстацца рэзервовым днём, каб прайсці ўступныя выпрабаванні. Такое рашэнне прынятае 1 ліпеня на пасяджэнні працоўнай групы па забеспячэнні дзейнасці дзяржаўнай камісіі па кантролі за ходам падрыхтоўкі і правядзення ўступных выпрабаванняў. На пасяджэнні разглядаліся праблемныя пытанні, звязаныя з уступнай кампаніяй, паведамляе БЕЛТА са спасылкай на прэс-службу ўраду.
Адным з пытанняў быў зварот старэйшага біскупа (старшыні) Канферэнцыі цэркваў хрысціян адвентыстаў сёмага дня ў Беларусі Вячаслава Бучнева. Ён прасіў даць магчымасць прадстаўнікам сваёй царквы здаць тэставанне па біялогіі і замежных мовах у рэзервовы дзень. Гэтыя ЦТ прыпадалі на суботнія дні (18 чэрвеня і 25 чэрвеня), а вернікі гэтай царквы не могуць удзельнічаць у падобных мерапрыемствах па рэлігійных перакананнях.
Раней дзяржаўная камісія ішла насустрач адвентыстам сёмага дня і дапускала іх да пераздачы ЦТ у выглядзе выключэння. Аднак падобная практыка не можа быць штогадовай і летась царкву папярэдзілі, што падобныя звароты больш не будуць разглядацца.
Сваё рашэнне камісія патлумачыла тым, што ўважлівай прычынай для пропуску ЦТ у асноўны дзень можа быць толькі хвароба або іншыя форс-мажорныя абставіны, пацверджаныя дакументальна. Рэлігійныя перакананні не ўваходзяць у пералік гэтых абставінаў. Таксама камісія нагадала, што ў вышэйшых навучальных установах прадугледжаныя заняткі і практыка па суботах, таму просьбу Вячаслава Бучнева не задаволілі.
