Беларусі могуць забараніць будаваць АЭС

Камітэт па выкананні міжнароднай Канвенцыі Эспо звярнуўся да грамадскіх арганізацый суседніх з Беларуссю краін — Украіны, Літвы, Латвіі і Польшчы. Міжнародная структура хоча атрымаць інфармацыю, неабходную для расследавання парушэнняў пры планаванні будаўніцтва АЭС, у якіх падазраецца Беларусь. Пра гэта БелаПАН паведаміў прававы эксперт і чалец рады ўкраінскай грамадскай арганізацыі Рэсурсавы і аналітычны цэнтр "Грамадства і навакольнае асяроддзе" Андрэй Андрусевіч. Камітэт па выкананні Канвенцыі Еўрапейскай эканамічнай камісіі ААН пра ацэнку ўздзеяння на навакольнае асяроддзе ў трансмежным кантэксце Эспо прыняў рашэнне адкрыць справу пра выкананне Беларуссю становішчаў Канвенцыі пры планаванні АЭС яшчэ ў верасні 2009 года. Ураду Беларусі быў накіраваны адпаведны запыт з просьбай адказаць не пазней за 31 снежня.

Як лічыць эксперт, рашэнне Камітэта кажа пра тое, што падазрэнні да Беларусі ў парушэннях узятых ёю міжнародных абавязанняў пры планаванні АЭС небеспадстаўныя. На яго думку, гаворка ідзе пра непраўдзівае і нясвоечасовае інфармаванне суседніх краін пра планы будаўніцтва АЭС.

Калі Камітэт прызнае гэтыя і іншыя парушэнні, то Беларусь могуць вымусіць прыпыніць будаўніцтва АЭС. Гэта працэс працяглы, але Камітэт можа прыняць рашэнне ўжо да канца гэтага года, падкрэсліў Андрусевіч.