Беларускія мытнікі: Расія не выконвае абавязанні па пастаўках нафты

Дзяржаўны мытны камітэт Беларусі выступіў з адмысловай заявай для прэсы. Яна прысвечаная бязмытным пастаўкам расійскай нафты ў Беларусь. У дакуменце паведамляецца, што Мытны камітэт Беларусі правёў перамовы з Федэральнай мытнай службай Расіі ды прапанаваў варыянты, каб спрасціць працэдуры перамяшчэння нафты і нафтапрадуктаў. Аднак, гаворыцца ў заяве, "Федэральная мытная служба Расійскай Федэрацыі, спасылаючыся на адсутнасць прамых указанняў і на тое, што адказнымі за рэалізацыю Дамовы паміж урадамі Расійскай Федэрацыі і Рэспублікі Беларусь пра меры па ўрэгуляванні гандлёва-эканамічнага супрацоўніцтва ў галіне экспарту нафты і нафтапрадуктаў вызначаныя Мінэнерга і Мінэканамразвіцця, ухілілася ад правядзення перамоваў па гэтым пытанні".

Мытны камітэт Беларусі гэтую сітуацыю ацаніў як невыкананне расійскім бокам, узятых на сябе абавязанняў па бязмытных пастаўках нафты.