Энтані Хопкінс аспрэчыў канфлікт з Крысам Хемсвартам

Энтані Хопкінс аспрэчыў інфармацыю пра сур'ёзны канфлікт, што ўзнік на здымачнай пляцоўцы фільма "Тор", у якім акцёр выконвае ролю Одзіна, вярхоўнага бога нямецка-скандынаўскай міфалогіі і бацькі Тора.  Пра гэта піша выданне LatinoReview. Раней у СМІ з'явіліся паведамленні, што Хопкінс раскрытыкаваў акцёрскія здольнасці выканаўцы галоўнай ролі Крыса Хемсварта, абвінаваціўшы яго ў няўменні граць без дапамогі так званага "зялёнага экрана", які выкарыстоўваецца для стварэння спецэфектаў.

Афіцыйныя прадстаўнікі Хопкінса сцвярджаюць, што нічога падобнага не адбывалася. "Для мяне вялікі гонар працаваць разам з Кенэтам Брана - рэжысёрам фільма і Крысам. Мы ўсе мяркуем, што камусьці проста спатрэбілася сфабрыкаваць гэтую гісторыю. "Тор" з'яўляецца адным з самых цікавых праектаў у маёй кар'еры", - гаворыцца ў афіцыйнай заяве акцёра.

Нагадаем, што Брана здымае фільм па матывах серыі папулярных коміксаў кампаніі Marvel. У карціне таксама здымаюцца Наталі Портман, Рэнэ Русо, Стэлан Скарсгард і іншыя вядомыя акцёры.

Прэм'ера "Тора" прызначана на 20 траўня 2011 года.

Фота: scifinow.co.uk