ЕС пашырыць “чорны спіс” беларускіх чыноўнікаў
“Чорны спіс” неўязных у Еўрасаюз папоўніцца суддзямі і пракурорамі, якія ўдзельнічаюць у расправах над палітвязнямі.
Пра гэта заявіў амбасадар Венгрыі ў Беларусі Ферэнц Контра. З яго словаў, Еўрасаюз не хоча бачыць на сваёй тэрыторыі людзей, якія здзекуюцца з грамадзянскай супольнасці ў Беларусі і патрабуюць пяць гадоў турмы ўдзельнікам акцыі 19 снежня, паведамляе “Наша ніва”.
Дыпламат лічыць, што “суды ў Беларусі не зусім самастойныя”. Калі б суды былі дэмакратычнымі, то гэтых людзей пакаралі бы максімум штрафам ці адміністрацыйным арыштам, заявіў спадар Контра.
Ён заўважыў, што рэакцыя ЕС не была пачутая ў Мінску. “Усё больш палітыкаў у ЕС выступаюць за ўвядзенне ў дачыненні да Беларусі кропкавых эканамічных санкцый”,паведаміў ён. “Калі наш голас не будзе пачуты, у нас проста не застанецца нічога іншага, акрамя ўвядзення далейшых санкцый. Палітычны дыялог паміж Беларуссю і ЕС не атрымліваецца”, заявіў дыпламат.
