Ляўковіч у СБ асуджае арганізатараў акцыі ад імя БСДП
Анатоль Ляўковіч на старонках газеты "СБ. Беларусь сегодня" выступіў з асуджэннем арганізатараў акцыі 19 снежня. Прычым, ён называе сябе старшынём Беларускай сацыял-дэмакратычнай партыі (Грамада) і выступае ад яе імя.
Нагадаем, восенню прайшоў з'езд БСДП (Г), на якім быў абраны новы старшыня — Анатоль Сідарэвіч. Аднак Ляўковіч не прызнаў вынікі з'езду і звярнуўся ў Мінюст. У выніку, чыноўнікі не прызналі з'езд і прынятыя ім рашэнні легітымнымі.
У публікацыі ў "СБ" Ляўковіч называе Статкевіча, Някляева, Рымашэўскага і Саннікава "радыкальнымі апазіцыйнымі дзеячамі" і сцвярджае, што яны "зрабілі сваёй мэтай нелегітымны, сілавы захоп улады".
Анатоль Ляўковіч піша, што "БСДП асуджае незаконныя дзеянні радыкалаў і падбухторшчыкаў". Ён заклікае "цвярозадумаючую частку апазіцыі" асудзіць іх дзеянні.
