Мадона ўзяла часовы перапынак

Амерыканская поп-спявачка Мадона вырашыла часова спыніць музычную дзейнасць і цалкам прысвяціць сябе здымкам новага фільма “W.E.”, рэжысёрам якога з'яўляецца сама спявачка.  Пра гэта выканаўца распавяла ў размове з рэжысёрам Гасам Ван Сэнтам, якая была апублікаваная ў новым нумары часопіса Interview. Сюжэт карціны заснаваны на гісторыі рамана караля Вялікабрытаніі Эдуарда VIII і амерыканкі Ўоліс Сімпсан.

Мадона паведаміла, што на гэты момант яна не звязаная кантрактамі з гуказапісваючымі кампаніямі і пакуль не плануе працаваць у студыі над новымі кампазіцыямі. Праца над фільмам забірае ўвесь вольны час і энергію выканаўцы.

Спявачка прызналася, што зараз яе не цікавіць лёс нават DVD-складанкі з запісамі, зробленымі падчас апошняга сусветнага турнэ Sticky & Sweet Tour. Рэліз DVD адбыўся ў сакавіку 2010 года і здолеў узначаліць амерыканскі хіт-парад лепшых музычных відэапрэм'ер.

У сваім інтэрв'ю Мадона адзначыла, што задумала зняць “W.E.” некалькі год таму, аднак не хапіла смеласці, бо зусім не мела рэжысёрскага досведу. Нагадаем, што ў 2008 годзе Мадона дэбютавала ў рэжысуры з фільмам "Бруд і мудрасць", але крытыкі сустрэлі карціну даволі халодна.

Фота: etoday.ru