Мінчук, што заблукаў у лесе, знайшоўся ў Столінскім раёне
Выратавальнікам ён патлумачыў, што прыехаў у Столінскі раён паглядзець на прыроду Прыпяцкага ландшафтнага заказніка.
8 ліпеня каля 22:30 у Столінскі РАУС з мабільнага тэлефона пазваніў мужчына, які паведаміў, што заблукаў, і папрасіў аб дапамозе.
"Мужчына сказаў дзяжурнаму, што знаходзіцца ў забалочанай мясцовасці ў раёне вёскі Стахава і не можа самастойна выбрацца", — цытуе прэс-сакратара Брэсцкага абласнога ўпраўлення МНС Сяргея Машнова інфармагенцтва БелаПАН.
Пошукам жыхара сталіцы займаліся аддзяленне пажарнай аварыйна-ратавальнай часці вёскі Відзібор і супрацоўнікі РАУС.
Каля дзвюх ночы 9 ліпеня 39-гадовага мужчыну знайшлі. Ён сядзеў на дрэве каля Прыпяці. Ад шпіталізацыі мужчына адмовіўся.
Паводле яго слоў, ён прыехаў у Столінскі раён паглядзець на прыроду Прыпяцкага ландшафтнага заказніка.
Фота: beautifulplace.by.
