МУС хоча заканадаўча забараніць падлеткам выпіваць і паліць
Забарону на курэнне і ўжыванне алкаголю, а таксама піва плануюць распаўсюдзіць на ўсіх, каму яшчэ не споўнілася 18 гадоў.
Як паведамляе БЕЛТА, МУС прапануе ўнесці адпаведныя нормы ў законе "Аб правах дзіцяці". Пад забарону таксама мусіць трапіць ужыванне наркотыкаў, псіхатропных рэчываў і аналагаў. У Адміністрацыйны кодэкс плануецца ўнесці адказнасць бацькоў за такія дзеянні дзяцей.
Таксама прапануецца замацаваць на заканадаўчым узроўні правядзенне абавязковых тэстаў сярод навучэнцаў устаноў адукацыі на прадмет спажывання алкаголю і наркотыкаў.
Гэтыя і іншыя пытанні будуць абмяркоўвацца на калегіі міністэрства, якая пройдзе 30 жніўня.
Сёлета непаўналетнія здзейснілі 7 злачынстваў у стане наркатычнага ўзбуджэння, 47 — звязаных з незаконным абарачэннем наркотыкаў.
Фота — dengi.onliner.by
