Papa Roach выдаюць "Метамарфозы"

Амерыканскія рокеры Papa Roach змянілі назву свайго новага альбома, які рыхтуецца да выхаду. Замест працоўнага тытула «Days of War, Nights of Love» дыск займеў новы – больш кароткі і гучны «Metamorphosis».

Па словах вакаліста гурта Джэйкабі Шэдзікса, музыкі «запісалі для альбома вельмі розныя рэчы. Там ёсць вельмі дынамічныя і цяжкія песні, а ёсць ціхія і спакойныя. Асноўная мэта была ісці наперад і штораз спрабаваць нешта новае. Новы альбом Papa Roach атрымаўся больш разнастайны і магутны за тыя, што былі раней».

Вядома, што гітарную партыю для адной з песень дыска запісаў Марс з гурта Motley Crue, разам з якімі Papa Roach збіраюцца гэтым летам у маштабны тур па ЗША.

Будучы дыск стане першай спробай новага бубнача Papa Roach – былога ўдзельніка Unwritten Law Тоні Палерма.

Нагадаю, што ён замяніў летась Дэйва Бакнера, які пакінуў гурт з-за кепскага стана здароўя.

Дадам, што апошні альбом амерыканскіх рокераў «The Paramour Sessions» датуецца 2006-м годам. А выхад новага дыска запланаваны на жнівень-верасень сёлета.

Фота: www.rhapsody.com