Рамонт Чырвонага касцёла ў Мінску быў прыпынены
Чырвоны касцёл у Мінску на пачатку рамонту / фота з сацсетак
Апошні месяц работы на рамонце Чырвонага касцёла ў Мінску амаль не вяліся. Нягледзячы на высокі плот, было заўважна, што будаўнікоў на пляцоўцы амаль не было, з касцёла не даносіліся характэрныя гукі рамонту, піша выданне katolik.life.
Пра ход рамонту вернікаў у парафіі не інфармуюць, таму папазўлі чуткі і здагадкі. Каб высветліць праўду, адзін з вернікаў датэлефанаваўся ў дзяржпрадпрыемства "Мінская спадчына", якое з'яўляецца ўласнікам будынка касцёла і заказчыкам работ.
На прадпрыемстве пацвердзілі, што на пэўны час рамонт быў прыпынены. Гэта патлумачылі неабходнасцю дадатковых работ: "Былі некаторыя пытанні, патрабаваўся час на праходжанне новай экспертызы".
Пры гэтым у "Мінскай спадчыне" верніка запэўнілі, што асноўныя работы ўжо аднаўляюцца, а тэрміны завяршэння рэканструкцыі не зменяцца.
Рамонт пачаўся ў чэрвені 2025 года. Увесці будынак у эксплуатацыю плануецца ў студзені 2027-га. Праўда, дагэтуль невядома, ці аддадуць яго зноў вернікам і на якіх умовах.
