Беларусь яшчэ не выдала Расіі "авіядэбашыра" Сяргея Кабалава (відэа)
Раней паведамлялася, што ўсе пытанні вырашаныя і экстрадыцыя адбылася ці неўзабаве адбудзецца. Аднак гэта не адпавядае рэчаіснасці.
Як інфармуе РІА "Новости", улады Беларусі яшчэ не вырашылі канчаткова пытанне аб выдачы Сяргея Кабалава. Пра гэта ў аўторак паведаміў афіцыйны прадстаўнік Генпракуратуры нашай краіны Пётр Кісялёў.
"Пакуль яшчэ не вырашаныя ўсе працэдурныя пытанні", — сказаў ён. Аднак Кісялёў упэўнены, што канчатковае рашэнне будзе хутка прынятае.
Нагадаем, 11 студзеня на борце самалёта рэйса "Масква-Хургада" нецвярозы Кабалаў біў бортправадніка і нецэнзурна лаяўся. Ён быў абвешчаны ў міжнародны вышук і 7 сакавіка яго затрымалі ў Беларусі ў Гродзенскай вобласці. У нашу краіну ён прыехаў у канцы студзеня з Украіны і больш за месяц хаваўся.
Праваахоўнікі Расіі вінавацяць Кабалава ў "замаху на захоп паветранага судна, учынены з ужываннем гвалту", а таксама "ў наўмысным прычыненні лёгкай шкоды здароўю з хуліганскіх памкненняў".
Фота — nnm.ru
