Беларускія барды мяркуюць зноў сабрацца пад Оршай
10 верасня яны паспрабуюць зладзіць традыцыйны спеўны фэст, які ўжо колькі год запар разганяе міліцыя.
Каб імпрэза не сарвалася, месца яе правядзення ды іншыя падрабязнасці не разгалошваецца. Вядома толькі, што гэта будзе не Крапівенскае поле, дзе барды збіраліся ў папярэднія гады. Рэч у тым, што поле проста ўзаралі, таму сабрацца на звыклым месцы будзе немагчыма. Адзін з актыўных удзельнікаў мінулых фэстаў, аршанскі гісторык Юры Копцік распавёў Радыё Свабода, што фармат сёлетняй імпрэзы — “сяброўскія пасядзелкі”. З яго слоў, вельмі рызыкоўна запрашаць гасцей з іншых рэгіёнаў, калі ёсць відавочная небяспека трапіць у міліцэйскі пастарунак за ўдзел “у несанкцыянаваным мерапрыемстве”.
Бардаўскі фэст “Аршанская бітва” традыцыйна праходзіў у Аршанскім раёне на Крапівенскім полі, якраз непадалёк ад таго месца, дзе 8 верасня 1514 году адбылася гістарычная Бітва пад Оршай. У гэтых мясцінах спевакі і слухачы збіраліся з 1992 года.
