Кілаграм цыбулі ў Ганцавічах каштуе 11 долараў
За 1 кілаграм цыбулі-сяўка гандляры на рынку патрабуюць з пакупнікоў 34 тысячы рублёў. Між тым, летась ён каштаваў 6-8 тысяч.
І нават гэтай вясной кошт такой цыбулі спачатку быў 9 тысяч за кілаграм. Раней пасяўной цыбулькай гандлявалі і ў крамах райспажыўсаюзу, і ў аддзяленнях паштовай сувязі. Цяпер нават шапік "Брэстнасеннегародніна" ўпрыгожаны надпісам: "Цыбулі-сяўка не будзе". Затое ў прыватнікаў яе процьма.
Многія жыхары рэгіёна сёлета адмаўляюцца набываць цыбулю па такіх коштах і высаджваць яе на прысядзібных участках. Народ спадзяецца, што ўвосень за гэтыя грошы набудзе цыбулю на ўсю зіму.
