Пінчука будуць судзіць за забойства лася
47-гадовага жыхара райцэнтра затрымалі 11 верасня на дарозе непадалёк ад вёскі Лозічы. Ён вёз у сваёй машыне тушу лася вагой 165 кг.
На мужчыну завялі крымінальную справу за незаконнае паляванне, паведамляе БелаПАН. Праверка ўжо вызначыла, што ён меў пуцёўку на здабычу вадаплаўнай птушкі, але пайшоў зусім у іншыя ловы. Фінансавыя страты ад яго паляўнічай прыгоды ацанілі ў 3 мільёны 300 тысяч рублёў.
Падазраваны раней не меў судзімасці і паабяцаў кампенсаваць гэтыя страты яшчэ да таго, як суд пачне разглядаць яго крымінальную справу.
