Прэзідэнта Венгрыі пазбавілі вучонай ступені праз плагіят
Такое рашэнне прыняў Будапешцкі ўніверсітэт медыцыны і спорту. У дысертацыі палітыка выявілі даслоўныя запазычанні з іншых навуковых працаў.
За пазбаўленне прэзідэнта Пала Шміта доктарскай ступені прагаласавалі 33 сябры вучонай рады ўніверсітэта. Як інфармуе ВВС, толькі чацвёра выказаліся супраць.
Скандал вакол навуковай ступені палітыка пачаўся ў студзені. Тады венгерскі эканамічны штотыднёвік HVG абвінаваціў кіраўніка дзяржавы ў плагіяце. Сам Шміт катэгарычна абверг гэтыя здагадкі і на заклікі апазіцыі сысці ў адстаўку адказаў адмовай.
Аднак адмысловая ўніверсітэцкая камісія выявіла, што 180 старонак тэксту дысертацыі часткова супадаюць з працай балгарскага даследчыка спорту, напісанай па-французску. Яшчэ 16 старонак былі скапіяваныя з працы нямецкага навукоўца. Агулам жа праца Шміта мае 215 старонак.
Палу Шміту 69 гадоў. У палітыку ён прыйшоў са спорту. У 1968 і 1972 гадах ён стаў чэмпіёнам Алімпійскіх гульняў у фехтаванні на шпагах.
