Продажы ў турфірмах знізіліся на 60 адсоткаў

110829 Zybliuk Kursy.mp3

У турфірме “Лайфтур” Еўрарадыё распавялі, што ў гэтым годзе беларусы традыцыйна адпачываюць у Турцыі, Балгарыі, Егіпце. Але эканамічны крызіс не прайшоў бокам.

“Зараз у нас мінус 60 адсоткаў продажу ў параўнанні з мінулым годам.”

Курсы валют у “Лайфтур” залежаць ад аператара. Напрыклад, буйны расійскі тураператар Teztour усталяваў курс долара ў 9500 рублёў. 90 адсоткаў кліентаў разлічваюцца валютай. На думку супрацоўніцы фірмы, гэта тыя, хто паспеў назбіраць валюту да крызісу.

“Да нас прыходзілі і казалі: “Ну вось, прынеслі апошнюю сваю валюту”. Неаднаразова чулі фразы кшталту: “Паедзем на адпачынак цяпер, год быў нядрэнны ўвогуле, але цяпер ужо не ведаем, калі зможам паехаць наступны раз.”

У турфірме “Нікатур” за 5 дзён курс долара падняўся на 500 рублёў і цяпер складае 9500 рублёў.

У інтэрнэт-краме “Ideas for life” карэспандэнту Еўрарадыё прапанавалі набыць мульціварку Panasonic за 190 долараў па курсе 9200 рублёў. Такі ж курс долара і ў інтэрнэт-краме “Техно-сити”.

А вось ў інтэрнэт-краме “Start”, што прадае мабільнікі, долар пакуль яшчэ каштуе 8700 рублёў. Тым не менш, супрацоўніца крамы кажа, што продажы мабільнікаў падаюць.

“Калі гэтае лета параўноўваць з мінулагоднім, то продажы знізіліся ўдвая.”

У нацыянальнай авіякампаніі “Белавія” еўра каштуе 7452 рубля і за 5 дзён амаль не змяніўся (7413 рублёў).

А вось у інтэрнэт-краме аўтазапчастак aw.by за гэтыя 5 дзён еўра падаражэў на 1000 рублёў і цяпер каштуе 12527 рублёў.

Фота: newsvm.com