Расійскія вайсковыя эксперты — за фінансаванне беларускага войска
З такой заявай выступіў прэзідэнт расійскай Акадэміі геапалітычных праблем Леанід Івашоў.
Па яго словах, якія перадае ІА "Новы Рэгіён", дапамагаць матэрыяльна беларускім Узброеным Сілам для Расіі нават выгадна. Івашоў адзначае, што па сутнасці, у Беларусі і Расіі адзіная абаронная прастора. Таксама ён нагадаў, што беларусь пастаўляе камплектуючыя для абарончых сістэм Расіі.
Яго падтрымлівае і загадчык аналітычнага аддзела Інстытута палітычнага і ваеннага аналізу Аляксандр Храмчыхін. На яго думку, грошы, вылучаныя беларускім вайскоўцам, на абараназдольнасці Расіі негатыўна не адаб'юцца. Храмчыхін мяркуе, што ў расійскага войска няма фінансавых праблемаў. Праблемамі ён назваў кіраванне, недахоп адэкватных кадраў і ў саміх узброеных сілах, і ў ваенна-прамысловым комплексе.
Нагадаем, што некалькі дзён таму Аляксандр Лукашэнка заявіў, што Расія магла б дапамагчы фінансава беларускаму войску.
