Тамары Сідарэнка не вярнулі адвакацкую ліцэнзію
Суд Маскоўскага раёна Мінска 28 кастрычніка адхіліў яе скаргу на пастанову калегіі Міністэрства юстыцыі аб спыненні дзеяння яе адвакацкай ліцэнзіі.
31 жніўня калегія зацвердзіла рашэнне аб спыненні дзеяння ліцэнзіі Сідарэнкі, якая абараняла кандыдатаў у прэзідэнты на выбарах 2010 года Уладзіміра Някляева і Алеся Міхалевіча. Гэтае рашэнне было прынята 17 жніўня кваліфікацыйнай камісіяй па пытаннях адвакацкай дзейнасці Мінюста на падставе двух прадпісанняў аб устараненні недахопаў у працы, якія былі выдадзены Сідарэнка сёлета, піша “Наша Ніва”.
Паводле слоў адвакаткі, яна не згодная з вердыктам раённага суда. Гэтае рашэнне яна лічыць незаконным і будзе скардзіцца далей. У касацыйным парадку яна маю намер падаць скаргу ў Мінскі гарадскі суд.
