Тэлевядучы Сяргей Дарафееў звальняецца з канала АНТ
Яму прапанавалі напісаць заяву аб звальненні. Што ён ужо і зрабіў. Дарафееў мяркуе, што АНТ не задаволілі ягоныя "асабістыя якасці".
Каментуючы "Камсамолцы" навіну пра сваё звальненне, Дарафееў паведаміў, што працуе на АНТ да канца месяца.
"З прафесіі сыходзіць не збіраюся. Буду працаваць і намагацца заставацца верным сабе", — сказаў тэлевядучы, адзначыўшы, што верагоднае працаўладкаванне і за мяжой.
Нагадаем, пасля спецыяльнага выпуску ток-шоў "Выбар" 19 снежня, прысвечанага прэзідэнцкім выбарам, Дарафеева адправілі на месяц у адпачынак. У эфір АНТ ён больш не вярнуўся.
"Пасля таго, як закрылі "Выбар", працаваць на канале з кожным днём мне было ўсё цяжэй і цяжэй псіхалагічна. Складвалася вельмі некамфортная абстаноўка", — адзначыў Сяргей.
