У Малдове два гады пустуе вакансія прэзідэнта краіны
11 верасня 2009 года былы кіраўнік дзяржавы Ўладзімір Варонін падаў у адстаўку, бо скончыўся другі тэрмін яго прэзідэнцкіх паўнамоцтваў.
З таго моманту краіна жыве без уласнага лідара і гэта з’яўляецца сусветным рэкордам. Рэч у тым, што ў Малдове прэзідэнта выбірае парламент, які дагэтуль не можа вызначыцца з новым кіраўніком дзяржавы. Пасля прыняцця адстаўкі Вароніна ў 2009 годзе дэпутаты прызначылі выканаўцам абавязкаў прэзідэнта Міхая Гімпу. У 2010 годзе яго змяніў Марыян Лупу, новы спікер парламента.
Праблемы з выбарамі на вышэйшую дзяржаўную пасаду ўзнікаюць з-за адмовы апазіцыі падтрымаць кандыдатаў, якіх вылучаюць улады. Неабранне прэзідэнта стала прычынай роспуску парламентаў двух скліканняў.
Плануецца, што 21 верасня кіруючая ў Малдавіі кааліцыя “Альянс за еўрапейскую інтэграцыю” абвясціць сваё рашэнне наконт новых выбараў кіраўніка дзяржавы, паведамляюць інфармагенцтвы.
