У Скідалі на Гродзеншчыне загарэўся дзіцячы садок
На шчасце, ніхто з дзяцей і выхавацеляў не пацярпеў.
Як паведамляе прэс-служба Міністэрства па надзвычайных сітуацыях, пра пажар у яслях-садку №4 прыкладна апоўдні паведаміла загадчыца ўстановы.
Гарэла дапаможнае памяшканне на другім паверсе дзіцячага садку. Пажар знішчыў складзеную там маёмасць — пасцельную бялізну, матрацы.
Да прыбыцця выратавальнікаў работнікі садка вывелі 54 дзяцей і размясцілі іх у гімназіі №1. Пасля гэтага апавясцілі бацькоў, і тыя забралі малечу па дамах.
Прычына пажару высвятляецца.
Фота — 112.by
